D’Ausstellung On water – sur l’eau vun der Banque européenne d’investissement weist aussergewéinlech Fotoe vum Yann Arthus-Bertrand a vum Philippe Bourseiller.
D’Ausstellung gëtt vum SCRIPT vun Oktober 2019 un wärend zwee Joer an sechs Lycéeën ze Lëtzebuerg gewisen. Wéinst der aktuelle Situatioun stelle mir se och digital zur Verfügung.
Di international renomméiert Ausstellung mat hire Fotoen iwwer Natuerwonner, zum Beispill aus der Antarktis oder Tansania oder Guinea, riicht sech un all Klassen (Enseignement fondamental an Enseignement secondaire.)
An dësen Zäite gi mer eis ëmmer méi bewosst, wéi wäertvoll a rar eis natierlech Ressourcë sinn, virun allem d’Waasser. On Water – Sur l’eau ass eng eemoleg Geleeënheet, fir de komplexen Thema eemol aneschters zu thematiséieren.
Wann dir duuschtereg sidd, maacht dir de Krunn op an drénkt.
Wan géif geschéien, wann näischt erauskéim?
Mir sinn all gewinnt, alles direkt ze kréie wat mir wëllen. Mee d’Klimaverännerunge weisen, dass mir iwwer den Afloss, den eis Verhalen op laang Siicht huet, missen nodenken. Mir mussen eis natierlech Ressourcë wéi zum Beispill d’Waasser erhalen a schützen. Des Foto-Kollektioun vum Yann Arthus-Bertrand an vum Philippe Bourseiller erënnert eis drun, dass mir eng nei Denkweis brauche fir d’Ëmwelt ze schützen, d’Egalitéit ze fërderen a fir d’Liewe vun de Mënschen iwwerall op der Welt ze verbesseren. Mir hänken all vum Waasser of. An dofir si mer all verantwortlech, fir et ze schützen.
